Vendor Review之彩色姊妹裙 (超長訂購經過及注意事項)

之前見到wow有幾篇中伏姊妹裙,就想分享一下我嘅姊妹裙,等大家多一個選擇!

我打從一開始就決定姊妹裙係淘寶訂造,原因如下:

1. 淘寶裙Cheap唔Cheap好睇你識唔識揀同好唔好彩,所以淘寶訂都唔一定係Cheap (我揀嘅係高質淘寶裙,¥150@)

2. 我相信香港公司好多姊妹裙都係大陸訂造或者大陸訂布返來做,咁同淘寶質量都差唔多

3. 價錢平一半甚至更多,我唔想俾多啲錢買一樣嘅野

4. 淘寶裙款式超多,我睇中果款係香港搵左幾間都無

5. 姊妹可以安坐家中度好Size俾我訂就得,唔駛老遠出到舖頭度身5分鐘就走 (如果近另計),條裙做好之後又老遠出去再試裙,一個唔好彩唔係即試即改又咁啱要改,咁就又要再老遠出去拎裙,咁樣來來回回最少兩三次,唔想麻煩到姊妹

講左幾個原因,淘寶訂好似好好咁,其實都有啲唔好,以下係一啲唔好嘅地方同埋我點樣解決:

1. 好難同親溝通: 奉勸大家最好唔好有tailor-made嘅要求,你見到鍾意先好落單,你要求tailor-made就真係祝你好運XD 基本上唔需要tailor-made,淨係俾尺寸訂造嘅就好OK (有嘢要改果啲如何中伏,我一陣再講)

2. 尺寸唔啱: 奉勸大家訂淘寶裙一定要。訂。綁。帶。絕對唔好貪方便做拉鏈款,拉鍊款係好方便,但尺寸唔啱就好頭痕喇,如果姊妹唔係專業度身,尺寸爭啲真係好正常,唔好怪親。如果做左綁帶都唔啱,咁就唯有拎出去改,但淘寶價錢平咁多,就算計埋拎出去改嘅價錢都平啲 (大大力推薦屯門清姐,一陣再講)

3. 無得試裙: 如果你堅持要所有姊妹都試過先訂,咁你都係適合係香港訂喇!我就係睇中左一款,咁啱上廣州見到實物都好靚好鍾意就決定左,我啲姊妹中等身材,個效果出來都幾好。

4. 裙到左咪又係要試: 我就無約姊妹出來試裙,而係逐個送上門俾佢地試,無我咁得閒又住屯門嘅朋友可以約定清姐同埋叫所有姊妹一齊去佢度試裙兼即場改,相信我,一定有幾條要改 (除非你訂2條Only),而清姐超好人俾我免費試裙但有幾條都唔駛改

5. 質地唔好: 無人叫你一下子訂哂咁多條返來,我就2條2條咁訂,第一次收到果下真係好驚喜佢個質地好靚先繼續訂

好啦,講完注意事項就入正題喇!我好鍾意彩色,所以我好想我嘅姊妹裙都係彩色,彩色姊妹裙影相好靚,但就會令到個新娘唔突出,咁我就決定8個姊妹用4隻色,兩個兩個咁分色,咁就既可以圓到我要彩色嘅要求,又可以稍為突顯一下新娘啦! (稍為架咋,如果你要啲人一眼就望到你,勸你都係用返淨色)

我想要絹布高貴啲,又驚好皺,咁啱俾我係淘寶睇中呢款,上身絹布下身紗,仲有幾隻色,Perfect Match!心裡已有決定,咁啱有次上廣州又見到實物,好啱心水,就開始左同親溝通嘅漫長旅程了⋯

淘寶圖:

廣州見到的實物圖:

我決定要4隻唔同色 (唔要灰色轉香檳金),但我驚伏,就訂兩件同色嘅返來睇下先,收到貨後真係喜出望外,質地好厚好靚,最緊要係絹布位一啲都唔皺,係咁易燙下紗位就得,我親自送兩條裙去俾姊妹試,綁帶款又幾啱身,有一件個腋下位差啲,但都可以接受!

既然咁滿意,梗係繼續訂啦!但我今次好衰唔衰走去要求想訂拉鏈款,佢本身無得揀拉鏈款架,係我私底下問佢可唔可以做到,佢就話OK幫我做,咁就大件事喇!一字肩個肩位太窄,可能平時佢做開綁帶款無為意個肩位size都無問我拎size,全部訂一字肩嘅都著唔落⋯好彩條裙本身唔係貴,改埋衫都平過香港訂絹布款,我就係兄弟姊妹見面果日嘅中午約哂啲姊妹去搵清姐,我本身話要改哂八件 (我諗住腋下位少少唔啱果啲都順便改埋),佢預左3個鐘俾我,最後有一條唔使改,有三條改唔到,佢淨係收左改四條幾錢,又係咁俾我地試衫,完全唔會覺得我地運吉,又好笑容又好態度,一個超溫柔媽媽款,我真係超鍾意清姐!之前Pre-wedding改婚紗已經覺得佢好好,再一次去都係咁好,真係要大大力推薦!

有三條改唔到,就唯有send返俾親幫我改綁帶,佢拖左我個幾月最後無改到,淨係幫我放鬆左,我真係好嬲!但竟然有兩條俾佢救得返我就算⋯仲有一條爭太多真係無辦法,唯有再搵清姐!我真係勁好彩,清姐竟然入左一樣嘅布可以幫我改綁帶,仲即改即拎超好呀!就係咁⋯八條彩色姊妹裙就係咁有驚無險地出場了⋯

清姐係我Big Day兩日前幫我用一個鐘完成的拉鍊改綁帶!實在感激不盡!

我的四色姊妹裙

最後,再次奉勸大家,訂淘寶裙真係真係一定要。訂。綁。帶!!唔好貪方便訂拉鏈款,其實姊妹裙全日都係着一次,都係綁一次帶,其實其實真係唔係好難⋯我相信好姊妹係一定唔會介意!如果你堅持訂拉鏈款,一係就訂大啲返來改,一係就係香港訂啦唔好煩XD 希望幫到心思思想淘寶姊妹裙又未決定到嘅你,我訂果間質素堅OK,但一定唔好訂拉鏈款(又講XD)!

**********更新**********

多謝大家有興趣,我唔逐個PM了,公開資料方便大家!

淘寶link:

【冬季伴娘服长款晚礼服2016新款伴娘团姐妹裙韩版缎面新娘敬酒服】http://www.dwntme.com/h.Z0NP2l7 点击链接,再选择浏览器打开;或复制这条信息¥knp60OVvv6D¥后打开手淘[来自超级会员的分享]


Featured Posts
Recent Posts
Archive
Search By Tags
No tags yet.
Follow Us
  • Facebook Basic Square
  • Twitter Basic Square
  • Google+ Basic Square