做個合格姊妹團 緊記「六不做」!

做人姊妹甚艱難,要早起又要照顧新娘,非常需要主角體諒。不過得到他人體諒同時,都要確保避免以下「六不做」,先算係合格姊妹團!

不搶新娘風頭 新娘先係婚禮主角,攝影師鏡頭下嘅人永遠都係以新人為先。如果搵著個貪靚姊妹,下下都要入鏡,仲要掛住自拍唔做嘢,真係寧願唔揀佢。

不奄尖挑剔 「6點就要到你屋企化妝?」「呢隻色嘅姊妹裙好顯肥!」「大日子嗰日嘅早餐可唔可以食好啲?」…雖則姊妹團唔係新娘嘅妹仔,但亦唔需要帝皇級服侍。事事先諗自己嘅姊妹,絕對唔係當日嘅好幫手。

不放飛機 一次半次去唔到姊妹團gathering都算,婚禮臨近用諸多借口推搪,話唔做姊妹團、甚至甩底,絕對會對新娘造成困擾,不單止影響婚禮流程,仲會因此破壞友誼。

不要做算死草 港女睇錢睇得較重,莫講話開門利是,就連專門為婚禮而買嘅高跟鞋、小披肩都可能會問新娘claim錢。咁斤斤計較,真係值得你問一句「友情何價?」。

不踩過界 玩新郎兄弟太過火、當面質疑長輩的吩咐,都會犯眾憎。萬一得罪曬你嘅親友,真係補救唔到。

不「呃酒飲」 有啲姊妹飲多兩杯就會失言,甚至搗亂。如果明知自己係呢種人,婚禮當日一定要滴酒不沾;即使佢酒力好好,但瘋狂「隊酒」都會予人不好的印象。


Featured Posts
Recent Posts